Ўзбекистон "ЭРК" Демократик партиясиКишан кийма, бўйин эгма, ки сен ҳам ҳур туғилғонсен!

Еmail орқали обуна

RSSга обуна

ХАБАРЛАР

“ОҚ ҚИЛИНГАН” РУСЛАННИНГ ОЛАМШУМУЛ ҒАЛАБАСИ ИЗИДАН

Шу йил 22 майидан 23 майига (шанбадан якшанбага) ўтар кечаси Германиянинг Росток шаҳридаги спорт мажмуида ватандошимиз, Жаҳон бокс ассоциацияси (WBA) версияси бўйича жаҳон экс-чемпиони Руслан Чагаев яккама-якка жангда очколар бўйича автралиялик Кали Миҳан устидан жаҳон чемпиони мақомига даъвогарликни яна қўлга киритиш учун оламшумул ғалабага эришди. Лекин жаҳон спортидаги бу шов-шувли воқеа уни ёмон кўриб қолган, тўғрироғи, уни “оқ қилган” Каримовнинг кўнглини зиғирча ҳам юмшатмади. Буни Ўзбекистон радио ва телевидениесининг бир марказдан (ўқинг: “Оқсарой”дан) берилган кўрсатма бўйича ялписига мум тишлаганидан билиш мумкин. Ушбу мусобақадан кейин, 25 майда чиққан республика газеталари ҳам ҳар хил спорт хабарларини беришди-ю, лекин машҳур боксчимизнинг тарихий жангини ёритишга ўз саҳифаларида жой топишмади.

Одатда бўлганидек, бу гал ҳам Россия телевидениеси Русланнинг ишқибозлари жонига ора кирди. Ўз вақтида Андижон хунрезлигини батафсил ёритиб, Ўзбекистон режими қаҳрига учраган “Рен-ТВ” телеканали бокс жангини маҳаллий вақт билан кечаси соат 2 да тўғридан-тўғри олиб кўрсатди. Ишқибозлар жанг олдидан Ўзбекистон байроғи кўтарилиб, мадҳияси янграганини, трибунада ўтирганларнинг деярли ҳаммаси Чагаев томонида эканини кўриб қувондилар.

Хабарларга кўра, боксчимиз жангини кўриш ва қўллаб-қувватлаш учун ўзбекистонликлардан атиги 3-4 нафар хаваскорларгина қатнашибди. Ўзбекистон байроғини бир швед кўтариб, байроқ матосини 2 украин ёзиб туришибди. 2007 йили Чагаев рус боксчиси Николай Валуевни енган мусобақада елиб-югуриб юрган элчихонамиз ходимлари ҳам кўринишмабди. Ҳолбуки ўшанда, 3 йил муқаддам Чагаев Валуевни енгиб, Ўзбекистонга қайтгач, режим томонидан “кўтар-кўтар” қилиб кутиб олингани, Каримовнинг шахсан ўзи унга мақтовлар ёғдириб, куёвлардек зарбоф тўн кийгизгани, “Ўзбекистон ифтихори” фахрий унвони билан сийлагани ҳали кўпчиликнинг ёдидан кўтарилгани йўқ.

Хўш, Андижонда туғилиб ўсган, Ер юзида Ўзбекистон деган юрт ва ўзи каби унинг ўғлонлари борлигини жаҳонга такрор ва такрор намойиш қилаётган, оғир вазн тоифаси бўйича Осиё ва жаҳон чемпиони бўлароқ “Оқ Тайсон” лақабини олган, татар миллатига мансуб 32 ёшли Руслан Шомил ўғли Чагаев қандай хатти-ҳаракатлар қилганки, ўзидан давлат раҳбарини бездирган? Ишонарли манбалар далолатига кўра, Руслан Ўзбекистон президентининг оиласига, хусусан унинг қизи Гулнора Каримова шаънига иснод келтирган эмиш. Бунга боксчининг ўзидан 6 ёш катта Гулнора билан кечган ишқий саргузашти ва шу ҳақда тарқалган узунқулоқ гаплар сабаб бўлган экан.

Лекин Чагаев ўз “қилмиш”ини яширишга уринаётган ёки ҳали ҳам тўлиқ англамаган ёхуд англашни истамаётган кўринади. Йўқса, ҳануз Ватан, Андижон ишқи билан яшаётган Руслан куни кеча берган интервьюсида президент ғазабига йўлиққанини рад этиб, чарчоғини ёзгач, юртига қайтишини айтибди. Кузатувчилар Русланнинг энди англиялик чемпион Давид Хэйни таслим қилиб, чемпионлик камарини қўлга киритиш орзуси ушалса ушалар, лекин унинг Ватанга қайтиш орзуси амалга ошмаслигини айтмоқдалар.

Қиссадан ҳисса: бугунги Ўзбекистонда президент хонадонининг нафсонияти давлатнинг ҳар қандай манфаатларидан устун туради.

Зиё ШАМС
Тошкент, 25 май.
“Эрк” веб-сайти учун махсус

Муаллиф admin on May 25th, 2010 рукни КУН МАВЗУСИ. You can follow any responses to this entry through the RSS 2.0. You can leave a response by filling following comment form or trackback to this entry from your site

Шарҳ ёзиш

Исм (шарт)

Mail (чоп этилмайди) (шарт)

Web-сайт