Ўзбекистон "ЭРК" Демократик партиясиКишан кийма, бўйин эгма, ки сен ҳам ҳур туғилғонсен!

Еmail орқали обуна

RSSга обуна

ХАБАРЛАР

МУТТАҲАМЛАР ТАНТАНАСИ

Мамлакатимизда кўпдан бери сиёсий ва иқтисодий бўхрон хукм сурмоқда. Кўпчилик иқтисодий субъектларнинг иш фаолияти расман тўхтатилган. Кўпчиликлари эса, бефойда фаолият кўрсатмоқда. Мамлакатимизда олиб борилаётган сиёсий, иқтисодий ва ижтимоий фаолият, ҳеч қандай қонун-қоидага мос тушмайди. Чунки бу системаларда бошқарув амаллари йўқотилган. Аммо “бошқарувчилар” бор. Амалдорлар бор. “Бошқарувчи” кадрларни, Республикамизнинг бош эгаси, ўзига хос ва ўзига мос усуллар билан кўрикдан ўтказади. Кейин эса улар лавозимга тайинланадилар. Шунинг учун ҳам тайинланган лавозим эгалари Президентларига “садоқатли”, халқни “тўғри” йўлдан четга чиқармайдиган, “нотўғри”ни адабини бериб қўядиган, давлат ишини эса шахсий манфаатларига бемалол алмаштириб биладиган, билим ва тажрибалари ўзига хос ва ўзига мос кадрлардан таркиб топган.

Президентимиз ўз қароргоҳларида ниҳоятда “ноёб” шахс ҳисобланадилар. Ўт балосидан, сув балосидан, халқимизнинг ғазабидан, атрофидагиларнинг фитнасидан, кўринар-кўринмас офатлардан асранишлари учун, у ўзларига-ўзи бир сари хусусиятлар ортирганлар. Президентимизнинг ўзига хос хусусиятлари, турли хил усуллар билан халқ онгига сингдирилади. Президентимиз орттирган хусусиятлар тубандагилардан иборат:

У (президентимиз) ҳамма нарсани билгувчидир, кўргувчидир ва эшитгувчидир. Хохлаган нарсасини қилгувчи. Хохласа рост, хохласа ёлғон гапиргувчидир. Ўзи танлаган ва тайинлаган барча амалдорлардан кучли ва қудратлидир. Ибтидосига 70 йилдан ошган. Бу дунёда интиҳоси ҳам бор, лекин буни ўзи биладими йўқми, бу менга номаълум. Шу пайтгача у ҳеч нарсани яратмаган. Онда-сонда Улуғ Яратувчини ҳам оғзига олиб турадилар. Амалдорлар ҳукумдорга, ўзига хос ва ўзига мос равишда, “ожизона” итоат қиладилар. Қўрқадилар.

Амалдорлар унга таваккул қилиб яшайдилар. Унинг ғазабига учраган ҳар бир амалдор ишдан четлатилади. Киримсиз ва кўримсиз бўлиб қолади. “Зеромакс” атрофида бўлаётган саргузаштлар, президентимизнинг бу хусусиятларини четлаб ўтаётган фигурантлар ҳам кўпаяётганидан ҳабар бераяпти.

Бугунги амалдорлар халқ тепасида, уни тепкилаб юришга ўрганган. Оммавий ахборот воситачилари, президентимизнинг мислсиз кўргазмаларига қатъиян амал қилиб халққа ахборот етказадилар. Уларнинг кундалик ҳабарларига кўра, мамлакатимиз хўжалик кўрсатгичлари, ҳар доим дунёнинг барча катта-кичик мамлакатларидан устин ва ўзгачадир. Чунки келажаги буюк мамлакатнинг президенти бугун буюк бўлиши керак-да.

Мактабларда ўқитувнинг йўқлиги, йўтал дорисини аптекадан ҳамманинг ҳам сотиб олишга қурби етмаслиги, мамлакатимиздаги оммавий ишсизлик на амалдорни, на ахборотчини қизиқтиради.

Мамлакатда кечаётган сиёсий, иқтисодий ва ижтимоий аҳволдан, бирор хақиқатни оммага айтмоқчи бўлсангиз, жиноятчи хисобланасиз. Бу ҳолда сизни албатта 10-15 йил қамоқ жазоси кутади. 2008 йил, 23-октябрь куни жиноят ишлари бўйича Амударё тумани суд мажлисининг “Мазлум” ҳуқуқ ҳимоячилари ташкилотининг директори Аъзам Турғунов устидан чиқарган ҳукм, бунга ёрқин мисол бўлаолади. Мутлақо айбсиз А.Турғунов, фақат ҳақиқатни излагани учун 10 йилга қамоқ жазосига ҳукм қилинди.

Бозорлар ва дўконлар четдан келтирилган истеъмол моллари билан лиқ тўла. Олувчи йўқ. Чунки зарурда пул йўқ. Пул қайдан бўлсин. Иқтисодда ишчи ўринлар аллақачон тугатилган. Мардикорга талаб оз. Россияда кризис. Қозоқда кризис. Бизда кризис йўқ эмиш. Чунки, бизда кризис билан учрашадиган объектнинг ўзи йўқ.

Пулимизнинг инфляцияси хисобсиз. Пул қанча керак бўлса, бизда шунча босиб чиқарилаверади. Молия системаси чириган. Пул-банк-пул системаси ноқонуний ишлар билан машғул.

Мен ўз халқини, миллатини ҳурмат қилувчилар ва севувчилар тоифасига кираман. Ўзбекнинг тани соғ бўлса, кетмони соз бўлса, у бир амаллаб оиласини халол ризқ билан боқаверади. У бир бурда нонни ҳеч кимдан тиланмайди. Амалдордан ҳам, президентдан ҳам. Керак бўлса, уларга охирги нонини ҳам ҳайрия қилади.

Халқимиз азалдан эътиқодга интилган, саводли одамни ҳурмат қиладиган, фарзандларининг илм ўрганишини ғурур биладиган, содда ва меҳнаткаш халқ. Хозир у ночор ҳолда. Кундалик ризқига боғланиб қолган. Бугун унинг бошқа нарсага қўли тегмайди. Унга жонкуяр ва мард элбоши керак. Бўлгуси бу раҳбар, мамлакат сиёсий, иқтисодий ва ижтимоий системасининг тўла ва эффектив ишлашини таъминлаб билиши керак. Бу ишни амалга ошириш, буюк сиёсатчининг ишидир.

Дунёда ҳар бир яхши иш, шу жумладан мамлакат реформаси ҳам:

Ўқи, Ўқи, Ўқи (Иқро) тушунчаларининг асл мазмунига таянади.

Халқ ва мамлакат ўзининг улуғ фарзандини кутмоқда!

2-3 йиллар бурун, халқ Президентимизнинг қизлари Гулнора Каримова тўғрисида куйиб-пишиб гапирар эди:

- пули кўп эмиш…

- эри йўқ эмиш…

- четда, уйлари катта эмиш… .

Раҳбарларимизнинг бетамизлигидан тўйган халқ, улар тўғрисида ҳозир ҳеч нарса гапирмай қўйди.

Оллох қиёматда қуйидаги тоифа одамларни, Ўзи яратган махлуқотларнинг ичидан энг ёмони деб хисоблар экан:

- алдоқчини;

- такаббурни;

- чақимчини;

- ғийбатчини;

- икки юзламачини – тилида Оллах деб, ўз фойдаси учун дарров шайтонни маъқуллаб, Оллахдан юз ўгирувчиларни;

- тухматчини;

Бу тоифа одамлар дўзахда каттиқ азобга тортилар экан.

Бугунги раҳбарларнинг амалий ишлари, юқорида кўрсатилган, хусусиятларига таянган ҳолда бажарилаяпди. Амалдор ўз президентидан миннатдор. Чунки у ниманинг эвазига бойлик орттираётганинин тушунади. Шу билан бирга, кундалик шахсий ишлари, Ўзбекистон Республикаси қонунлари доирасида ҳам оғир жиноят эканини биладилар.

Президент, ўзи танлаган ва тайинлаган “керакли” кадрларни, ўз қонунларидан ҳам ўз вақтида ҳимоя қилади.

Порахўр муттаҳам ҳар куни пул ишлайди. Муттаҳамлар катта пул ишлайдилар. Улар шунча пулни нима қиладилар?

-          улар бир-биридан кимўзарга иморатлар қурадилар,

-          дунёнинг кўнгил очар, чиройли матохларига ўзларини урадилар,

-          бу пулларга мамлакат учун керакли, янги технологияларни жорий қилмайдилар,

-          ижтимоий объектлар қурмайдилар,

-          жамиятнинг, маънавиятнинг, илму-фаннинг равнақи учун пул тикмайдилар.

Вақт шуни тақозо қилаяптики, мамлакат тикланишининг асосий шартларидан бири, бугунги раҳбарият тўла составда, ўз президентлари И.А.Каримов бошчилигида истеъфо беришлари керак.

Худодан қўрқмаган кимсалар бу ишни асло қилаолмаслар. Уларга ҳеч ким, ҳеч нарса дея олмайдилар. Менинг ҳам фақат дуога кучим етади холос.

Эй Парвардигоро! Жаҳолат гирдобига гирифтор бўлган раҳбарларимизга, инсоф бергайсан.

Уларнинг ҳар куни қилаётган гунохларини камайтиргайсан. Халқимизнинг орзу-умидларини рўёбга чиқар. Халқимни, Ўзингнинг мехр-шавқатингдан, ризқу-рўзингдан, рахмдил ва меҳрибон хосиятларингдан янада кўпроқ бахраманд қилгайсан.

Халқимизга тинчлик-омонлик билан фаровон ва осойишта келажагини бергайсан. Халқимизга тенглик ва биродарлик неъматларини ҳамиша муяссар қилгайсан. Омин!

Н.Р.Джуманиёзов
“ЭPK” демократик партияси аъзоси

Муаллиф admin on Apr 22nd, 2010 рукни СИЁСАТ. You can follow any responses to this entry through the RSS 2.0. You can leave a response by filling following comment form or trackback to this entry from your site

Шарҳ ёзиш

Исм (шарт)

Mail (чоп этилмайди) (шарт)

Web-сайт